நீங்கள் தேடியது "வந்தே பாரத் ரெயில்"

புதுடெல்லி:

நாட்டின் அதிவேக ரெயிலான ‘வந்தே பாரத்’ ரெயில் கடந்த 15-ந்தேதி தொடங்கி வைக்கப்பட்டது. மணிக்கு சராசரியாக 130 கி.மீ. வேகத்தில் செல்லும் இந்த ரெயில் டெல்லி-வாரணாசி இடையே இயக்கப்படுகிறது. இந்த ரெயில் தனது வர்த்தக ரீதியான பயணத்தை நேற்று முன்தினம் தொடங்கியது.

இந்த முதல் பயணத்திலேயே தடங்கல் ஏற்பட்டது. அதாவது காசியாபாத்-துண்ட்லா இடையே கடும் பனிமூட்டம் இருந்ததால் ரெயில் மணிக்கு 60 கி.மீ. வேகத்திலேயே இயக்கப்பட்டது. இதனால் முதல் பயணமாக வாரணாசி சென்ற போது 1.25 மணி நேரம் தாமதமாகவே வாரணாசியை அடைந்தது.

இதைப்போல அங்கிருந்து டெல்லி திரும்பிய போதும் இதே நிலை நீடித்ததால் டெல்லிக்கு 1.48 மணி நேரம் தாமதமாக வந்தடைந்தது. பயணிகளின் பாதுகாப்பு கருதியே இந்த வேகக்குறைப்பு எடுக்கப்பட்டதாக ரெயில்வே அதிகாரிகள் தெரிவித்தனர்.  #VandeBharatExpress

புதுடெல்லி:

நாட்டின் முதல் அதிவேகமான ரெயிலை சென்னை ஐ.சி.எப் தொழிற்சாலை தயாரித்தது. என்ஜின் இல்லாமல் இயங்கக்கூடிய இந்த ரெயிலுக்கு ‘வந்தே பாரத்’ எனப் பெயரிடப்பட்டது. கடந்த வெள்ளிக்கிழமை டெல்லியில் நடந்த விழாவில் பிரதமர் மோடி ‘வந்தே பாரத்’ எக்ஸ்பிரஸ் ரெயிலைக் கொடியசைத்து தொடங்கி வைத்தார். சோதனை ஓட்டமாக டெல்லியில் இருந்து உத்தரப்பிரதேசத்தின் வாரணாசி நகருக்கு சென்ற வந்தே பாரத் ரெயில், அங்கிருந்து டெல்லிக்கு திரும்பியபோது நடுவழியில் பழுதானது. பின்னர் பழுது நீக்கப்பட்டு டெல்லி கொண்டு வரப்பட்டது.

இந்நிலையில், ‘வந்தேபாரத்’ எக்ஸ்பிரஸ் ரெயில் வர்த்தக ரீதியான தனது முதல் பயணத்தை நேற்று தொடங்கியது. இது குறித்து ரெயில்வே மந்திரி பியூஸ் கோயல் தனது டுவிட்டர் பக்கத்தில் தெரிவிக்கையில், ‘வந்தேபாரத் எக்ஸ்பிரஸ் ரெயில் டெல்லியில் இருந்து வாரணாசிக்கு இன்று(நேற்று) தனது முதல் வர்த்தகப்பயணத்தை தொடங்கியது. அடுத்த 2 வாரங்களுக்கு டிக்கெட்டுகள் விற்றுத் தீர்ந்துவிட்டன. உங்களுக்கான டிக்கெட்டுகளை இன்றே பெறுங்கள்” என குறிப்பிட்டார்.